Angrezi Nizam e Taleem - انگریزی نظام تعلیم

پسِ نو آبادیاتی نظری مباحث نے ہماری توجہ چند ایسے پہلوؤں کی جانب مبذول کروائی ہے جو اس سے قبل اہل علم کی نظروں سے پوشیدہ تھے۔ان میں ایک پہلو مرکزی اہمیت کا حامل تھا جس کے تحت نو آبادیاتی طاقت ( انگریزوں ) نے مغلوب اقوام پر اپنے استبداد کو دوام عطا کرنے کے لیے علم ، تعلیم اور تدریس کو بطور موثّر ذرائع(Instruments) استعمال کیا۔ہندوستانی اقوام کو جسمانی و طبعی اطوار پر سرنگوں کرنے کے بعد ذہنی غلامی کا اسیر بنانا بہت ضروری تھا، چناں چہ تعلیمی و تدریسی ذرائع کو از سر نو تشکیل دیاگیا۔اس ضمن میں عیسائی مبلغین نے انگریز سرکار کی بے حد معاونت کی۔ علاوہ ازیں متعدد مشاہیر نے اپنی پیش کردہ تجاویز سے ہندوستانی عوام کو اپنے تیئں تہذیب وترقی کی راہ پر گامزن کرنا چاہا جن میں لارڈ میکالے، چارلس ووڈ، کرنل ہالرائیڈ اور ڈاکٹر لائیٹنر سرفہرست تھے۔ ان جیسے ان گنت مغربی پالیسی سازوں اور مستشرقین نے یہاں ایسے اداروں کی ابتدا کی جو کہ مغربی افکار و اقدار کی ترویج کا ذریعہ بنے اور ایک یکسر نیا " فرد"مرض وجود میں آگیاجو کہ آزادی (1947) کے بعد بھی حقیقی آزادی کی نعمت سے محروم ہی رہا-